اُڈپی ،5 / فروری (ایس او نیوز) مغربی بنگال سے تعلق رکھنے والا ایک مہاجرمزدور آم توڑنے کے چکر میں الیکٹرک سروس وائر سے شاک لگنے سے ہلاک ہوگیا ۔
    
ذرائع سے ملی اطلاع کے مطابق کوکنمنّا نامی یہ شخص سنتے کٹے مارکیٹ کے پاس گزشتہ دو مہینے سے ایک زیر تعمیر اپارٹمنٹ کامپلیکس کے لئے سلاخیں موڑنے (بار بینڈنگ) کا کام کرتا تھا ۔ اس کے ساتھ کام کرنے والے مغربی بنگال ہی کے دوسرے مزدور بیشو داس نے اپارٹمنٹ بلڈنگ کا بجلی کنکشن دینے والی سروس وائر کو ایک آم کے درخت سے باندھ رکھا تھا ۔ کوکنمنّا درخت پر لگے آم توڑنے اس پرچڑھا تو حادثاتی طور پر الیکٹرک سروس وائر کو چھو گیا اور بجلی کا شاک لگنے سے سیدھے زمین پر آ گرا ۔ اسے اسپتال لے جانے کی کوشش کی گئی مگر اس نے راستے میں ہی دم توڑ دیا ۔ 
    
مقامی لوگوں کا کہنا ہے کہ اپارٹمنٹ کے سپروائزر آلوین کوڈروس اور الیکٹریشین منجو ناتھا کی بے پروائی کی وجہ سے کوکنمنّا کو اپنی جان سے ہاتھ دھونا پڑا۔ پولیس نے اس سلسلے میں کیس درج کر لیا ہے ۔